U MOT TIROT SINGH u don ha Mairang kaba jngai kumba 45 Km. na ka nongbah jong ka jylla Meghalaya ka sor Shillong. U don thik ha ka jaka pdeng jong ka surok bah Shillong-Mairang-Nongstoin bad ka surok Nongkhlaw-Mairang. La pynieng ia une u Mot haka jing kynmaw ieid ia u Syiem Tirot Singh, jong ka Hima Nongkhlaw, uba la ialeh pyrshah ia ki phareng ha u snem 1829. U Tirot Singh ula shah kem noh ha ki phareng ha ka 13 tarik u Kyllalyngkot, 1833 bad la set phatok ia u ha Dhaka Central Jail. Ula khlad noh na kane ka sla pyrthei ha u snem 1835 katba u dang don ha phatok Dhaka.
Ia u Maw nongrim jong une u Mot la buh ha ka 15 tarik jong u Nohprah snem 1953 da u Shri Jairam Das Daulatram, Uba long u Kobarnor jong ka Assam ha kata ka por, lym bad ka jingiadon ryngkat lang jong U Shri Bishnuram Medhi, Uba long u Myntri Rangbah Duh ka jylla Assam ha kata ka por. La pyndep ia une u Mot bad la plie da u Kobarnor ha u snem 1954. Ula kylla long kum ka jaka ba khring ia ki nong jngoh kai pyrthei haduh kine ki sngi.
